ul_sciapan

жаночая логіка

Sun, 12 Jul 2009 17:31:11 GMT

**
Дзіўна, калі барышні, якія некалі мяне выключылі з узаемных фрэндоў, заходзяць пачытаць-паглядзець мой часопіс.
Настальжы, ці змена парадыгмы?

**

д'ябал у дэталях

Sun, 12 Jul 2009 14:06:46 GMT

**
У вагон метро зайшлі салдаты. Што на іх глядзець -- аднолькавыя. Цяжка нечым вылучыцца, бо ўсё аднолькавае -- вайсковае. Але, заўважыў, што чорныя чаравікі былі забэрсаныя ў кожнага салдата па-свойму... Дзіўна. Чаму статут гэтую акалічнасць не прапісаў? Д'ябал жа заўжды ў дэталях.

**

я і грошы

Sun, 12 Jul 2009 14:00:21 GMT

**
Я люблю грошы: беларускія, амерыканскія, розныя...Заўсёды падымаю, нават дробныя, нават -- дзесяць рублёў, ці манетку(калі жонкі няма побач)...
А Вам сорамна, што Вы любіце грошы?

**

тры таўстуны

Sun, 12 Jul 2009 07:48:10 GMT

**
Тоўстухі жанчыны, выклікаюць замілаванне, як дзеці.
Пра мужчын-таўстуноў такое не скажу.

**

мемуары

Sat, 11 Jul 2009 17:53:11 GMT

**
Мемуары палітыкаў, якія не захапілі ўладу, нагадваць гісторыі п’яных рыбакоў, якія не выцягнулі вялікую-вялікую рыбіну. Была на кручку, але потым ….

**

хайку

Sat, 11 Jul 2009 07:57:08 GMT

**

Прабіты квіток
закладкай працуе ў
"Байцоўскім клубе".

**

кнігі

Sat, 11 Jul 2009 06:39:49 GMT

**
Кнігі перабіраю. Некаторыя лічу сваімі, быццам сам напісаў.
У мяне ўсё добра… Кнігі перабіраю.

**
І міліцыянеры бываюць шчаслівымі. Хоць кніжак і не чытаюць.

**

свае

Fri, 10 Jul 2009 05:57:39 GMT

**
КРАСА І СІЛА – гэта пра БЕЛАРУСАК.

**

свае

Thu, 09 Jul 2009 15:40:47 GMT

**
ДАЧКА. ВЕЧАР.

**

масква

Wed, 08 Jul 2009 18:46:54 GMT

**
У Маскве адрубілі інтэрнэт!
Тры дні не прыходзіць з Масквы ліст...
Абама вінаваты.

**

тэст

Wed, 08 Jul 2009 18:14:47 GMT

**

Скажы, якая на тваім кампутары мова "па замоўчванні" -- і я скажу хто ты.

**

дараванне

Wed, 08 Jul 2009 18:11:30 GMT

**
Ішлі з жонкай побач з паркам і сустрэлі рудога чысценькага ката. Жывёла сядзела пад парканам каля цырка і каўкала. Каток выглядаў дагледжаным, ашыйнік пабліскаў. Мы падумалі, што ён згубіўся і хацелі ўзяць. Каток засычэў, на рукі не пайшоў. Колькі крокаў бег за намі і каўкаў…
Задаўся пытаннем; “А каму чалавек больш даруе шкодныў учынкаў – кату, ці сабаку?”

**

рыбкі-слонікі

Tue, 07 Jul 2009 18:06:01 GMT

**
Мама майго сябра

Я жыў на трэццім паверсе, а мой сябар на чацьвёртым. Валодзька быў светлагаловы і кучаравы, а я валасы меў цёмныя і прамыя. У майго сябра на палічцы канапы, былі раней такія канапы з валікамі, люстэркам і палічкамі, стаяла чарада слонікаў. Мне падабаліся тыя цяжкаватыя слонікі. Я зайздросціў Валодзьку. У мяне дома былі ў серванце парцылянавыя рыбкі-чарачкі. Адна вялікая – бутэлька, а да яе дванаццаць маленькіх. Сябру падабаліся рыбкі, а мне слонікі… Мы былі падшыванцамі адчайнымі, але бацькі нас любілі, хоць сварыліся.
Але я не пра тое…
Я падпісаў сябру часопіс са сваімі апавяданнямі. Там заместа ілюстрацый старыя фотаздымкі на якіх наш гэ.пэ., на якіх мы з Валодзькам. Ён светлагаловы і кучаравы, а я з цёмным чубам.
Але я зноў не пра тое…
Валодзькава мама – цётка Зіна, калі сын паказаў ёй той часопіс – моцна расплакалася, глядзела на тыя дзіцячыя здымкі і плакала. Чытаць не чытала, а вось ад картак чорна-белых вачэй не адводзіла.
Усё ж добра, усе жывыя-здаровыя, а яна плакала…
І чаго плакала цётка Зіна?

**

горад

Tue, 07 Jul 2009 08:58:14 GMT

**
АДАМ ГЛОБУС. РУЖОВЫ РАНАК.

**

язык и мёд

Tue, 07 Jul 2009 08:15:52 GMT

**
Беларуская мова – дзіўная… З прысмакам гарачай крыві і намерзлага жалеза клямкі, якую лізнуў вільготным языком. Даўно лізнуў, гады чатыры было, а памятаю, як АДЗІРАЎ язык ад жалязякі… А дарослыя смяліся – свінню ў двары білі… І толькі дзед пашкадаваў і памазаў мой скрываўлены язык мёдам. Узяў са слоіка на ўказальны палец зацукравелага мёда і павадзіў мне па языку…
Дзіўная беларуская мова.

**

артыстка

Mon, 06 Jul 2009 18:52:30 GMT

**
Немаладая жанчына ў краме набывала цукар, зефір у шакаладзе, батон, сыр. Шырокія рукавы швэдара аб’ехалі. На белай скуры цямнелі: бэзавыя, ружовыя, жаўтлявыя сінякі. І на шыі, пад вухам, цямнеў сіняк.
“Артыстка з Купалаўскага. Даўно не заходзіла. Я толькі па голасе і пазнала” – сказала прадавачка Тамара.
У галаву прыйшло, што жанчыну сіняк не ўпрыгожвае, нават, на шыі.

**

горад

Mon, 06 Jul 2009 14:55:36 GMT

**
"СВІСЛАЧ СУДАХОДНАЯ"

**

назіранне

Mon, 06 Jul 2009 14:22:15 GMT

**

Найбольшае расчараванне і радасць прыносяць уласныя дзеці.

**

мой ЖЖ ... здзіўленне

Mon, 06 Jul 2009 13:56:29 GMT

**
Як думаеце, каго ў мяне ў фрэндах больш -- жанчын, ці мужчын?
Не падглядаць!!!

**

горад

Sun, 05 Jul 2009 15:12:14 GMT

**
"ТАЕМНЫ СНЯДАНАК"

**

назіранне

Sun, 05 Jul 2009 14:33:11 GMT

**

Медалі не любяць тыя, у каго іх няма.

**

логіка

Thu, 02 Jul 2009 19:11:36 GMT

**
Пра выбух 3 чэрвеня 2008 года.

Я ў кватэры не куру. Выходжу на лесвічную пляцоўку. Там, пры вялікім вакне, побач з кветкамі, пад фортачкай і куру, у двор гляжу, на неба, на абрыс каменнага чалавека, што на даху Палацы Прафсаюзаў, птушак цікую… Парожнія цыгарэтныя пачкі складаю ў палічку, на якой вазон з кветкай. Акуратна складаю, як цагліны ў сцяну. Мне парадак падабаецца. Пачкаў парожніх штук пяцьдзесят… Попельніца побач. Выходжу толькі што, каб пакурыць, а ўсе мае пачкі растрыбушаныя, сцяна акуратная -- зруйнаваная. Акрамя міліцыянера з чорнай цаглінай рацыі не было нікога… Усе да апошняй пачкі раскрытыя…
Цыгарэту хлопец, відаць шукаў.
Адкуль яны там маглі быць? А раптам? Логіка…

Усе павінны здаць адбіткі пальцаў… Логіка.

**

зубар

Thu, 02 Jul 2009 18:29:05 GMT

**
Дык вось ты які, зубар беларускі? палатно, фарба 17х14 метраў.

**

ШТО ГЭТА?

Thu, 02 Jul 2009 18:04:26 GMT

**

НЕШТА ПАЧЫНАЕЦЦА НА ПРАСПЕКЦЕ ПОБАЧ З ЦЫРКАМ.
вокны загадалі не адчыняць да 23, у пад'ездах міліцыя, на праспекце натоўпы. ШТО ГЭТА?

**

самалёты і танкі

Thu, 02 Jul 2009 15:07:56 GMT

**

Пару дзён лётаюць над горадам знішчальнікі.
Палохаюся, хоць і ведаю, што гэта -- падрыхтоўка да свята.
А як жахліва, калі яны будуць лётаць з іншымі мэтамі.

**